ئەمرۆ 3ی2ی2025 بەرێز د.عبدالله مەلا وەیسی سەرۆکی یەکێتی زانایان بە ئامادەیی بەرێزان مامۆستا مەلا جەلال خەیلانی جێگری سەرۆک و ژمارەیەک لە ئەندامانی مەکتەبی تەنفیزی؛ پێشوازی لە شاندێکی باڵای نوێنەرو کەسایەتییە ئایینەکانی ئەوروپا بەسەرۆکایەتی قەشە نیک باینز سەرپەشتیاری کەنیسەی ئینگلتەڕا کرد.
لە دانیشتنکدا باس لە رەوشی ئایینی هەرێمی کوردستان و دیدی زانایان لەمەڕ پرسە هەنووکەییەکان بەتایبەت مافی مرۆڤ و پێکەوەژیانی ئایینی و قبوڵکردنی یەکتری و ئازادی و پرسە یاساییەکانی پەیوەست بە خێزان و باری کەسی کرا.
لەلایەن خۆیەوە بەرێز سەرۆکی یەکێتی زانایان وێڕای بەخێرهێنان پوختەیەکی لە بارەی رۆڵی زانایان لەمەڕ خزمەتکردنی رەوشی ئایینی و گەیاندنی پەیامی میانڕەوی و رەتکردنەوەی گوتاری رقەبەری و توندڕەوی و قوڵکردنەوەی پێکەوەژیانی ئایینی باس کردو ئاماژەی بەوەدا بەردەوام زانایانی ئایینی پاڵپشتی ئەزمونی کوردستان و سەقامگیری کۆمەڵگەن، هەروەک تیشکی خستە سەر ئەو خاڵەش کە کاتی داعش هێڕشی کردە سەر کوردستان و ناوچەکە هەر زوو زانایانی ئایینی پاڵپشتیان بۆ پێشمەرگەو پێکهاتەکان دەربڕی و بەهانای لێقەوماوان چوون و دەرگای مزگەوتەکانیان بۆ ئاوارەکان کردەوە بێ جیاوازی کدرن لە نێوان موسڵمان و مەسیحی و ئێزیدی، ئەم هەنگاوەش کاریگەری زۆری لە دڵنەوایی خەڵکی زیانمەند لەدەستی داعش هەبوو.
لەلایەن خۆشیانەوە شاندی ناوبراو وێڕای سوپاسی هەڵوێست و تێڕوانینەکانی یەکێتی زانایان، باسیان لە چەند پرسێکی دیکەی عیراق و کوردستان و ناوچەکە کردو بەتایبەت هەڵوێستی یەکێتی زانایانیان بەرز نرخاند سەبارەت بە رەتکردنەوەی پرۆژە پێشنیاری هەمواری یاسای باری کەسی لە پەرلەمانی عیراق، بۆیە ئەوان ستایشی ئەم هەنگاوە دەکەن و رۆڵی یەکێتی زانایان لە پرسی پێکەوەژیانی ئایینییان بەرز نرخاند.
