ئەمرۆ 18ی10ی2025 بە ئامادەبوونی سەرۆک مسعود بارزانی و بە بەشداریی مامۆستایان و زانایانی ئایینی ئیسلام و پێکھاتە ئاینەکانی دیكهی ھەرێمی کوردستان، کۆبوونەوەیەکی فراوان لە هۆڵی سەعد عەبدوڵڵا لە هەولێر بەڕێوە چوو.
سەرۆک بارزانی لە میانی گوتارێکدا وێڕای بەخێرهاتنی میوانەکان، ئاماژەی بەوە کرد، فەرھەنگی پێکەوەژیانمان لە باب و باپیرانمانەوە بۆ ماوەتەوە، ئێمە ھەموومان مرۆڤین و بەندەی خواین، بینینی ئێوە بە یەکەوە جوانترین نموونەی ڕەنگینی نیشانی جیھان داوە.
هاوکات جەختی لەوە کردەوە، ئەم فەرھەنگی پێکەوەژیانە زۆر خزمەتی کوردستان و مێژووەکەشی کردووە، تیرۆر کە ھات جیاوازیی نێوان ئایینەکانی نەکرد، بۆیە نابێ جیاوازی لە نێوان خۆماندا بکەین.
سەرۆک بارزانی، ئومێدەوارە ئەم فەرھەنگی پێکەوەژیانە بەردەوام بێت و پتر بچەسپێت. گوتیشی: پلانی زۆر دژی ئەم ھەرێمە دروست دەکرێت، بە درێژایی مێژوو ئەمە سیاسەتی دەسەڵاتەکانی عێراق بووە، بۆیە تەنیا بە یەکبوون و پێکەوەییمان بەرانبەر ھەموو ئاڵگنارییەک دەوەستینەوە، ئەمەش لەپێناو بەرژەوەندی و داھاتووی خەڵکی کوردستان.
لە درێژەی قسەکانیدا سەرۆک بارزانی باسی لەوە کرد، دووژمنان بە ھەموو ڕێگەیەک دەیانەوێت کولتووری ڕەسەنی کوردەواری تێک بدەن و بە زۆر ڕێگەی جیاواز دێنە نێو ئاداب و کولتووری ڕەسەنی کوردەوارییەوە، بەڵام پشت بە خوا و یەکبوونی ئێوە، ئەم ھەنگاوە نامۆیانە لەنێو دەبرێن.
لە بارەی گوتاری میانڕەوییەوە، سەرۆک بارزانی ڕایگەیاند: "گرنگە زانایانی بەڕێز پتر ڕۆڵی خۆیان ببینن، بۆ ئینتیمای خاک و خۆشەویستی بۆ نیشتمان، ھەروەھا بەرەنگاریی ماددەی ھۆشبەر کە ئافاتی سەردەمە و کار لەسەر تێکدانی شیرازەی گەنجەکانمان دەکرێت، ھەموو ھەنگاوێک بۆ ئەم مەبەستە، بنەما و بڕوا و کاری ھەموو ئایینەکانە."
دواتر بەرێزان وەزیری ئەوقاف و کاورباری ئایینی و سەرۆکی یەکێتی زانایان روونکردنەوەی زۆریان لەپێناو رەوشی ئایینی و رۆڵی زانایان و پێکهاتە ئایینیەکان لە قوڵکردنەوەو پاراستنی پێکەوەژیانی ئایینی دا.
لە وتەیەکدا بەرێز د.عبدالله مەلا وەیسی سەرۆکی یەکێتی زانایان وێڕای تیشک خستنە سەر خزمەت و رۆڵی زانایان و پارێزگاریکردن لە کوردستان و بایەخدان بە هەستی ئایینپەروەری و نیشتمانپەروەری، هەروەها ئاماژەی بە چەند پێشنیارێکدا، کە خواستی زانایانی ئایینی و واقعی دیندارین لە کوردستان، لەوانە پێویستی کردنەوەی دامەزراندن بە رووی مامۆستایانی ئایینی خۆبەش و کردنەوەی زانکۆیەکیی ئیسلامی و نەهێشتنی بەربەست لەبەردەم زانایان بۆ بەدەستهێنانی بڕوانامەی باڵاو پالپشتی کردن لە پرۆسەی پاراستنی بەها ئایینی و ئەخلاقیەکانی گەلەکەمان و پاراستنی دەسکەوتەکانی کوردستان.
