پەیامێك بۆ لایەنە سیاسی و حکومیەکانی هەرێمی کوردستان

بەناوی خوای بەخشندەی میهرەبان


(وَلَا تَنَٰزَعُواْ فَتَفۡشَلُواْ وَتَذۡهَبَ رِيحُكُمۡ وَٱصۡبِرُوٓاْ إِنَّ ٱللَّهَ مَعَ ٱلصَّٰبِرِينَ )


بۆ/ سەرۆکایەتی هەرێمی کوردستان                                 


سەرۆکایەتی پەرلەمانی کوردستان


سەرۆکایەتی حکومەتی هەرێمی کوردستان


حزب و لایەنە سیاسیەکانی کوردستان


ماوەیەکە کێشەو قەیرانێكی سیاسی یەخەی هەرێمی کوردستانی گرتووەو، خەریکە وڵات و نیشتیمان بەرەو ئاقارێکی نادیارو پر لە لێکترازان دەبات، بۆیە وەك هەستکردنمان بە بەرپرسیارێتی مێژوویی ئاینی و نیشتیمانی و مرۆیی بە پێویستی دەزانین بەناوی سەرجەم زانایانی ئایینی و سەیداو مەلایانی کوردەوە دەنگی خۆمان بگەیەنینە هەموو لایەکتان بۆ ئەوەی بە زمانی گفتوگۆو بە هەستێکی کوردانەو پڕ لە بەرپرسیارێتی کۆتایی بەم قه‌یرانه‌ بێنن و، یەکڕیزی و تەبایی کوردستان بپارێزن، بێگومان ئەمە رێزگرتنە لە خوێنی شەهیدان و فرمێسکی دایکان و ماندوبوونی پێشمەرگەو خۆراگری خەڵکی کوردستان، کە لە پێناوی پاراستنی کوردستان بەرگەی هەموو قەیرانە ئەمنی و ئابووریەکانیان گرت.


لێرەوە داوا لە هەموو لایەك دەکەین بگەنە سازانێکی دروست و هەموو لایەك پێکەوە لەسەر مێزی گفتوگۆ ناو ماڵی کورد بپارێزن و، هەوڵبدەن هەموو لایەك بەشداری ئەم سازانە بکات و کەس پەراوێز نەخرێت، چونکە کوردستان لە قۆناغێکی زۆر هەستیار دایە، هەر لێکترازانێك لەم دۆخەدا مەترسییە بۆ سەر ئایندەی پرۆسەی سیاسی، تێکچوونی پرۆسەکەش تێکچوونی ناو ماڵی کوردە، ئەمەش وڵات بەرەو دۆخێکی خراپ دەبات، بەمەش هەموومان زیانمەند دەبین، هەر ئەو خەمخۆریەی کوردستانیشە وای لە ئێمە کردووە، کە داوا دەکەین چیتر ئەم حاڵەتە درێژە نەکێشێ و ناو ماڵی کورد نەشێوێندرێت، بێگومان بەرژەوەندی گشتی وڵات و کوردستان لە هەر بەرژەوەندیەکی تر گەورەترە.


هەر لێرەشەوە داوا لە جەماوەری کوردستان دەکەین، دان به‌ خۆیان دابگرن‌و هه‌ریه‌كه‌و له‌ ئاستی خۆی كار بكات بۆ یەکخستنەوەی ناو ماڵی کوردو پاراستنی نەتەوەپاریزی و نیشتیمانپارێزی و یەکپارچەیی هەرێمی کوردستان، بە دڵنیاییەوە خەڵکی کوردستان ماندوبوونی سەدان ساڵەی لە بیر ناچێت بۆیە رێگە نادەن بە هیچ هێزو لایەنێك ببێتە مایەی تێکدانی ئارامی کوردستان، بێگومان هاوڵاتیانی کوردستان ئاواتەخواز بوون ململانێی لایەنە سیاسیەکان لەسەر باشتر خزمەتکردن بە خەڵکی کوردستان و دەربازبوون بوایە لەم دۆخە، نەك لەسەر پۆست و پایەکان بکەن.


 


یەکێتی زانایانی ئایینی ئیسلامی کوردستان


13/8/2015