یه‌کێتی زانایانی ئاینی ئیسلامی کوردستان

چه‌مچه‌ماڵ: ته‌قه‌ له‌ ماڵی به‌رپرسی لقی زانایان ده‌كرێت

چه‌مچه‌ماڵ: ته‌قه‌ له‌ ماڵی به‌رپرسی لقی زانایان ده‌كرێت

به‌یانی رۆژی 22/2/2017 چه‌ند كه‌سێكی نه‌ناسراو ته‌قه‌یان له‌ ماڵی مامۆستا مه‌لا عبد الوهاب سه‌نگاوی به‌رپرسی لقی چه‌مچه‌ماڵی یه‌كێتی زانایانی ئایینی ئیسلامی كوردستان كرد، له‌ ئاكامدا گوله‌كان به‌ به‌ر خانووی ماڵه‌كه‌یی‌و ئۆتۆمبێله‌كه‌ی كه‌وتن، خۆشبه‌ختانه‌ زیانی گیانی نه‌بوو.

لێره‌وه‌ جارێكی تر ناڕه‌زایی‌و نیگه‌رانی خۆمان راده‌گه‌یه‌نین به‌رامبه‌ر ئه‌و دیارده‌ نه‌شیاوو ناشارستانیانه‌ی ده‌رهه‌قی هاوڵاتیان ده‌كرێن له‌ كوشتن‌و ته‌قه‌لێكردن، بێگومان ئه‌مه‌ هه‌ڕه‌شه‌یه‌كی راسته‌وخۆیه‌ بۆ سه‌ر گیان‌و ماڵی هاووڵاتیان، به‌تایبه‌تی زانایان‌و مامۆستایانی ئایینی، كه‌ وێڕای ئه‌ركی گرانی ژیانیان، له‌ هه‌مان كاتدا به‌شێكی دانه‌بڕاون له‌ ئازارو ناخۆشی‌و خۆشییه‌كانی خه‌ڵكی كوردستان، بۆیه‌ بڵاوبوونه‌وه‌ی ئه‌و دیاردانه‌ ده‌رهه‌قیان هه‌ڕه‌شه‌یه‌ بۆ سه‌ر ته‌واوی خه‌ڵك‌و تێكدانی گیانی هاوكاری‌و به‌پیریه‌كه‌وه‌چوونه‌.

به‌ ئه‌ركی سه‌رشانی ده‌زگاو هێزه‌ ئه‌منیه‌كانی ده‌ڤه‌ری چه‌مچه‌ماڵ ده‌زانین تاوانبارانی ئه‌م رووداوه‌ بدۆزنه‌وه‌و بیانده‌نه‌ دادگاو به‌ یاسا مامه‌ڵه‌یان له‌گه‌ڵدا بكرێت، به‌پێچه‌وانه‌وه‌ درزێكی گه‌وره‌یه‌ بۆ تێكدانی ئارامی‌و نه‌مانی متمانه‌ی هاووڵاتیان.

مه‌كته‌بی ته‌نفیزی

یه‌كێتی زانایانی ئایینی ئیسلامی كوردستان

23/2/2017