شاندێکی باڵای یەکێتی زانایان سەردانی کۆڕبەندی فیقهی ئیسلامی و کۆمەڵەی رابیتەی زانایانی عیراق لە شاری بەغدا دەکات

رۆژی ۲۳ی۱ی۲٠۲۳ شاندێکی باڵای مەکتەبی تەنفیزی یەکێتی زانایان بەسەرۆکایەتی بەرێز د. عبدالله مەلا وەیسی سەرۆکی یەکێتی زانایان و یاوەری مامۆستا مەلا جەلال خەیلانی جێگری سەرۆک و د.حسن موفتی و د.عمر مرۆ و د.عرفان رەشیدو د.محمد نصر الله و د.حسن خۆشناو و مەلا عبدالله شێرکاوەیی ئەندامانی مەکتەبی تەنفیزی سەردانی شاری بەغدایان کردو چەندین دیدارو کۆبوونەوەیان لەگەڵ کەسایەتی و ناوەندە ئایینی و ئەکادیمیەکان ئەنجام دا.


ئامانجی سەرەکی سەردانەکە بایەخدانە بە پەیوەندی نێوان دامەزراوەو مەرجەعە ئایینیەکانی عیراق و پتەوکردنی هەماهەنگی و تەئکید کردنەوەی پەیامی ئاشتی و میانڕەوی زانایانی کورد و قسەوگفتوگۆی پەیوەست بە مافی نەتەوەیی و دەستووری کەلی کوردو کارکردن لەسەر خاڵە هاوبەشەکان بۆ زیاتر ئاگا لێک بوون و یەکتر قبوڵکردنی نێوان پێکهاتەو مەزهەبەکان.


سەرەتا شاندەکە سەردانی کۆمەڵەی رابیتەی زانایانی عیراقی کردو لەلایەن بەرێز د. شێخ حامد عبدالعزیز شێخ حەمد سەرۆکی کۆمەڵەی ناوبراو و ئەندامانەوە بەگەرمی پێشوازی کران و لە دانیشتنێکدا وێڕای خۆشحاڵی دەربرین بە سەردانی شاندی یەکێتی زانایان باس لە رۆڵ و پێگەی زانایان کورد کرا، کە لە ماوەی رابردوو خزمەتێکی گەورەیان لەبواری ئایینی و نیشتمانی پێشکەش کردووەو لەکاتی تەنگانەش کوردستان دەرگای لە هەموو پێگهاتەکانی عیراق کردۆتەوە بێ جیاوازی ئایینی و نەتەوەیی و مەزهەبی، لە بەشێکی دیکەی دیدارەکە باس لەوە کرا کە پێویستە خاڵی هاوبەش بکەینە بناغەی هەنگاوی ئایندە نەک بەرەو ململانێ و ناکۆکی بمانبات ئەمەش خواستی ئیسلامە بۆ هەموو لایەکمان.


دواتر شاندەکە سەردانی کۆربەندی فیقهی ئیسلامی گەورە زانایانی عیراقی کدرو لەلایەن بەرێز دکتۆر شێخ ئەحمەد حسن تەها سەرۆکی کۆڕبەندەکە بەگەرمیەوە پێشوازی کرا.


سەرەتا بەرێز د. عبدالله مەلا وەیسی سەرۆکی یەکێتی زانایان سوپاسی پێشوازی گەرمی کۆڕبەندەکەی کردو ئاماژەی بە پەیوەندی نێوان هەردوولاو پێویستی پەیوەندی نێوان دامەزراوەیی ئایینی هەولێرو بەغدا کرد، کە رۆڵێکی گرنگی لە ئاراستەکردنی پرۆسەی ئاشتی و گەیاندنی پەیامی میانڕەوی و یەکتر قبوڵکردن هەیە، ئاماژەی بەوەشدا کە خاڵی هاوبەش و لایەنی پیشەیی بنەمایەکی گرنگە بۆ کارکردن و هەماهەنگی و رێزگرتن لە خواست و مافە ئایینی و نەتەوەییەکانی یەکتری.


لەلایەن خۆشیەوە بەرێز د. ئەحمەد حسن تەها سەرۆکی کۆڕبەندی فیقهی ئیسلامی لە عیراق وێڕای خۆشحاڵی و بەخێرهێنانی گەرمی شاندەکە، ئاماژەی بەوەدا کە ئەم سەردانە بە گرنگ دەزانن بۆ قوڵکردنەوەی پەیوەندی و یەکخستنی تواناکان لەپێناو پرۆسەی ئیسڵاح و ئاشتی و کاری پێکەوەیی، ئێمە برای یەکترین و دەبێ هەرواش بمێنینەوەو لە هەنگاوی خێر پاڵپشتی یەکتر بین.


هەروەها گوتیشی: گرنگە زانایان وەک پزیشک چارەسەری گرفت و ئاریشە هەنوکەییەکان بکەن و بە یەک چاو سەیری هەمووان بکەن، دەزانم یەکێتی زانایان لە کوردستان دەستێکی باڵای هەیە لە خزمەت و هەنگاونان بەرەو ئاشتی و لێک نزیککردنەوەی نێوان پێکهاتەکان و بڵاوکردنەوەی خۆشەویستی و تەبایی نێو موسڵمانان، بۆیە ئەرکی هەمووانە بە یەک دەست کار بکەین بۆ نەهێشتنی ئەو هەوڵ و هەنگاوانەی مەترسین بۆ سەر کیان و ئایندەی کۆمەڵگەکەمان.