سەد ساڵ  ساڵ زیاترە بیرمەند و شاعیر و دڵسۆزانی کورد  بە شیعر و گووتار وخەباتی دیبلۆماسی و جەنگ و خوێن بەخشین بەدەم داخ وحەسرەتەوە سەر دەنێنەوە لە داخی داگیرکەر و ساختەچیە فێڵبازەکان کە هەمیشە بەناوی هاودینی و خوداوە کوردی سادە و دڵساف فریو دەدەن و هەموو شتێک بۆ خۆیان بە حەڵاڵ  ڕەوادەبینن و  بۆ کوردیش  بەدەستهێنانی هەموو مافێک بە خیلافی دین دەزانن !

 بۆ ئەم مەبەستە هەمیشە لێزانانە دژایەتی نێوان ئاین داری  و هەستی نیشتمان پەروەریان لای تاکی کورد بەگژیەکتردا داوە و سەرەنجام ناکۆکی و ئاژاوە و کێشمەکێشیان دروستکردووە و هەمیشە بەرهەمەکەشی زیاتر ژێر دەستەیی و  خاوەنی حاڵ و ماڵی خۆ نەبوون و پارچە پارچەیی و  بێ دەوڵەتی بووە بۆ کورد.

بەدرێژایی مێژووی نوێ بەم بیرکردنەوەیە کورد دەچەوسێنرێتەوە و لەسەر خاکی خۆی دەربەدەر و ئاوارە دەکرێت و قڕ و قەتڵ و عام دەکرێت و  هەمیشە قوربانیە بۆ دەڵەت و حوکمڕانی عەرەبی عێراق و تورکی تورکیا و فارسی ئێران و عەرەبێکی دیکەی سوریا !

  ئێستا لەدوای  پیلانی شەڕانگێزی عەرەبچێتی دەسەڵاتدارانی سوریا  لە دژی کورد دیسانەوە بەناوی دینداری و بێ دینیەوە !  حەرامێتی و دروستنەبونی بەرگریەوە !  گوتارێک هەیە ڕەوایەتی دەدات بە پێخۆشبون بە کوشتاری کورد و شەڕ و شۆڕ و وێران کردنی ماڵ و حاڵەکەیی و سەرکەوتنی ئەوان و بەزین و سەرشۆڕبونی کورد .

  ئەسڵ ئەوەیە کورد شانازی بە کوردایەتی و سەرکەوتنی کوردەوە بکات لە جیهاندا و بەتایبەت لە بەرگریکردن لە خاکەکەی خۆیی و  بە دەستهێنانی مافە ڕەواکانی کە   دەبێت کورد بە هەموو چین و توێژەکانیەوە پشتگیری لە یەکتری بکەن نەک هەر ستەملێکراو بگرە ئەگەر ستەمکاریش بێت ! واتە ئەگەر کوردێک لە جێگەیەک ستەمکار بوو "کە هەرگیز واشنەبووە" دەبێت هاوکاریبکەین خۆبەخۆ و لەناوخۆماندا بیری بخەینەوە کە ستەم نەکات نەک هاوکاری هێزی بێگانە لە سەری و دڵخۆشبین بە تێکشکانی کورد بە بیانوی ئەوەی بۆچی بەرگری دەکەن یان بۆچی ئەندامێکی ئەو گروپە کوردیە تاوانبار یان گوناهبارە ، کە ئەم بیرکردنەوەش هەڵەیە هەتا ئەگەر کافر و بێدینیش بێت ، چونکە ئەگەر کافرێکی نا کوردیش هاوکاری کرد  و دانی بە ماف و دۆزی ڕەوای گەلی کوردا نا و لە سەنگەری گەلی کوردی زۆرینە موسڵماندا بەرگری کرد پێویستە دەستخۆشی لێبکەین و نزای سەرکەوتنی بۆ بکەین چجای کوردێکی موسڵمان بێت و ڕوو بە ڕووی داگیرکەری دڵ پڕ لەقین و خوێن خۆر بێتەوە .

لە ئاینی ئیسلامدا مافەکان پلە و ئاستیان جیاوازە، بۆ نمونە :

- ئەگەر خزم یان هاو خوێن و نەتەوەت بوو مافی لەسەرت هەیە .

- ئەگەر دراوسێت (هاونیشتمانیت) بوو  مافێکی دیکەی هەیە .

- ئەگەر  هاودینت (موسڵمان)بوو  ئەوە هەرسێ مافەکەی هەیە !

گەلی کورد لە هەموو دونیا زۆربەی زۆری موسڵمانە کەواتە کورد لە هەموو جیهان لەگەڵ هەرکێ ڕووبەڕووبویەوە خەباتی بۆ بەدەستهێنانی مافەکانی کورد کرد ئەرکێکی ئاینی و نەتەوەیی سەرشانی هەموومانە کە پشتگیری بکەین .