ئەمرۆ 29ی7ی2024 بەرێز د.عبدالله مەلا وەیسی سەرۆکی یەکێتی زانایان؛ بە یاوەری بەرێزان مامۆستا مەلا جەلال خەیلانی جێگری سەرۆک و مەلا عبدالله شێرکاوەیی ئەندامی مەکتەبی تەنفیزی یەکێتی زانایان، سەردانی ژووری بازرگانی و پیشەسازی هەولێریان کردو بەگەرمیەوە لە لایەن بەرێز گەیلان حاجی سەعید سەرۆکی ژووری بازرگانی و پیشەسازی و ئەندامانی ژوور پێشوازی کران.
لە دانیشتنێکدا سەرۆکی یەکێتی زانایان پیرۆزبایی لە سەرۆك و ئەندامانی ئەنجومەنی کارگێڕی ژووری بازرگانی و پیشەسازی هەولێری کردو هیوای سەرکەوتنی بۆ خواستن، دواتر ئاماژەی بە رۆڵ و گرنگی ژووری بازرگانی لە نوێنەرایەتی كردنی چینێکی هەرە گرنگ و کاریگەری کۆمەڵگە کردو رایگەیاند، ئەرکێکی پیرۆز لەسەر شانی ئێوەیەو رۆڵتان هەیە لە چاککردن و بەرەو پێشبردنی رەوشی ئابووری لە هەرێم، بۆیە گرنگە بە ویژان و هەستی بەرپرسیارێتی کار بکەن و بە شێوەیەک دەرفەت برەخسێنن بۆ بازرگانانی وڵات لەرووی کوالێتی و لەبەر چاوگرتنی ئاسایشی خۆراک خزمەت بە هاوڵاتیانی هەرێم بکەن. لەم پێناوەش ئامادەی هەموو هەماهەنگی و پاڵپشتیەکین تا بتوانین پێکەوە خزمەتی خەڵکی خۆمان بکەین، هەر لەم دانیشتنەدا سەرۆکی یەکێتی زانایان تیشکی خستە سەر پیرۆزی کاری بازرگانی لە ئاینی ئیسلام، گرنگی پێدان بە کاروباری بازرگانی و ئابووری لەرووی ئایینیەوە.
لە لایەن خۆشیەوە بەرێز گەیلان حاجی سەعید سەرۆکی ژوور وێرای بە گەرمی بەخێرهێنان، باسی لە کار و چالاکیەکان و بەرنامەی داهاتووی ژووری کردو رایگەیاند کە ژووری بازرگانی بە هەموو توانایەکیەوە هەوڵی خزمەتکردن دەدەن، بە شێوەیەك کە رەنگبداتەوە لەسەر ئابووری هەرێمی کوردستان و وتیشی؛ پشتیوانی یەکێتی زانایان و گشت دەزگا و دامەزراوەکانی هەرێمی کوردستان بۆ ئێمە زۆر گرنگە.
هەروەها ئاماژەی بەوەدا کە رۆڵی زانایان لە هۆشیارکردنەوەی کۆمەڵگەو هاوڵاتیان زۆر گرنگ و کاریگەرەو پێویستە هەمووان بە چاوی رێزەوە لێی بڕوانین.
شایەنی باسە لە دانیشتنەکەدا بەرێزان: کامەران سەڵاح باجگر جێگری سەرۆکی ژوور و حاجی ئیبراهیم گەردی و کامەران محەممەد ساڵح و رەشید مستەفا میرخان ئەندامانی ئەنجومەنی کارگێڕی ژوور ئامادەی دانیشتنەکە بوون.
