ئەمرۆ 6ی2ی2025 بەرێز د.عبدالله مەلا وەیسی سەرۆکی یەکێتی زانایان بە ئامادەیی بەرێز مامۆستا مەلا جەلال خەیلانی جێگری سەرۆک و ژمارەیەک لە ئەندامانی مەکتەبی تەنفیزی و سەرکردایەتی و بەرێوەبەری گشتی حەج و عومرە؛ پێشوازی لە کەسایەتی دیاری کوردستان بەرێز دکتۆر شێخ مادیح شێخ عوسمان سیراجەدین کرد.
لە دانشتێکدا بەرێز سەرۆکی یەکێتی زانایان وێڕای بەگەرمی بەخێرهێنان و خۆشحألی دەربڕین، سەردانی بەرێزیانی بۆ مەکتەبی تەنفیزی بەرز نرخاندو ئاماژەی بە رۆڵی زانایانی ئایینی و شێخانی تەریقەت بەتایبەت بنەماڵەی شێخ عوسمان سیراجەدینی نەقشبەندی لە بایەخدان بە رێبازی شەریعەت و تەریقەت و بڵاوکردنەوەی دینداری و عیرفان و تەسەوف و پێکەوەگرێدانی هزری ئیسلامپەروەری و نیشتمانپەروەری و میانڕەوی و راهێنانی خەڵک و کۆمەڵگە لەسەر تەبایی و ئاشتی کۆمەڵایەتی و پێگەیاندنی رۆڵەکان لەسەر رێچکەو رێبازی ئەدەب و پەروەردەی دەروونی و خۆ راهێنان لەسەر سلوک و رەوشتبەرزی کرد، هەروەک هاتنەوەی بەرێزیانی بۆ کوردستان وەک کەسایەتی دیاری بنەماڵەی خۆیان بە گرنگ وەسف کرد.
لەلایەن خۆشیەوە بەرێز شێخ مادیح شێخ عوسمان نەقشبەندی سوپاسی خۆی ئاراستەی سەرۆک و ئەندامانی مەکتەبی تەنفیزی یەکێتی زانایان کردو ئاماژەی بە رۆڵ و پێگەی زانایان و شێخانی تەریقەت کرد لە خزمەتی دین و ژینی موسڵمانان و بڵاوکردنەوەی رۆحی مرۆڤدۆستی و تەبایی و بەرژەوەندی گشتی خەڵک و خاک، هەروەک ئاماژەی بەوەشدا کوردستان لە دێر زەمانەوە رێڕەوێکی تایبەتی هەبووە بۆ خزمەتی دین و تێگەیشتنی دینداری و پابەندی بە ئامۆژگاری زانایان، ئەم قۆناغەش وا دەخوازێ زیاتر بایەخ بەم رێبازە رەسەنەو قوڵکردنەوەی تەسەوف و عیرفان هەیە بۆ ئەوەی ئەو میراتە پارێزراو بێت، کە زانا چاکەکانمان بە ئەمانەتەوە رادەستی ئێمەیان کردووە.
