به‌ناوى خواى گه‌وره و میهره‌بان
رۆژى 23/9/2017 ، لێژنه‌ى حوكه‌ماى ئه‌هلى سوننه‌ى سه‌ر به خانه‌ى فه‌تواى عێراقى به‌یاننامه‌یه‌كیان ده‌ركردووه دژى بریارى ئه‌نجامدانى گشتپرسی له‌هه‌رێمى كوردستان ، كه تێیدا خوێن و گیان و ماڵ و ناموسى و كه‌ڕامه‌تى هاوڵاتیانى كوردستان حه‌ڵاڵ ده‌كات و فه‌تواى ده‌ست رێژیكردن ده‌ركات بۆ سوپای عێرق و حه‌شدى شه‌عبی به‌وه‌ى هه‌رچى له‌ده‌ستیان دێت له هه‌نگاوى سیاسی و سه‌ربازى بگرنه به‌ر .
ئێمه له كاتێكدا به‌ناوى سه‌رجه‌م زانایانى ئاینى ئیسلامى كوردستان ئه‌م به‌یاننامه‌یه به شێوه‌یه‌كى گشتى ره‌ت ده‌كه‌ینه‌وه، له هه‌مان كاتیشدا توشى شۆك بوین چۆن خه‌ڵكێك خۆى به موسڵمان و زانا و حه‌كیم ده‌زانن كه‌چى گه‌لى كوردستان له كه‌مترین مافی سه‌ره‌تایی بێ به‌ش ده‌كه‌ن كه گوزارشتكردن له ڕاو سه‌رنجی خۆیان ده‌كه‌ن ، ئه‌وه له‌كاتێكدا ئاینى ئیسلام مافى ڕاده‌ربڕینی داوه به هه‌موو كه‌سێك به پیاو ژنه‌وه ، موسڵمان و ناموسڵمانه‌وه ، كه‌چى ئه‌وانه تا ئه‌وه‌ى ئه‌و كه‌مه مافه‌ش به گه‌لى كوردستان به ڕه‌وا نابینن و به‌م كاره‌شیان عه‌قلى ئه‌م حه‌كیمانه‌ى سوننه‌ى وه‌ك دواكه‌وتوترین ئه‌قلیه‌ت وێناى كه‌ن، و ئاینى ئیسلامى پێ ناشیرین ده‌كه‌ن، و ئیسلام وه‌كو دیكتاتۆریه‌تترین رێباز پیشان ده‌ده‌ن ، له كاتێكدا ئیسلام ئاینى ره‌حمه‌ت و برایه‌تى و ئازادى ڕاده‌ربڕینه . دڵنیا ین ئه‌گه‌ر چاوێكیان به ده‌قه‌كانى قورئانى پیرۆز و سوننه‌تى پێغه‌مبه‌رى خوا بخشاندبا ده‌یانزانى ئه‌م هه‌نگاوانه‌یان ته‌واو دژى بنه‌ماكانى ئاینى پیرۆزى ئیسلامه.
به‌ڵام له‌لایه‌كى دیكه بۆ ئێمه چاوه‌ڕواننه‌كراو بوو كه‌سانێك هه‌بن فتواى له‌و شێوه‌یه ده‌ربكه‌ن ، به تایبه‌تى مێژووى عێراق شاهێده كه هه‌میشه كه‌سانێكى شۆڤێنى خۆپه‌رست له‌عێراقدا به‌رگى ئایینی یان داوه‌ته كاره مرۆڤكوژه‌كان و بۆیان شه‌رعاندون، ئه‌وانه هه‌مان ئه‌قلى به‌عسه كه گیان و خوێن و دین و ناموسى كوردستان حه‌ڵال كردووه ، ده‌ره‌نجام قاتى و قوڕى كورد كوژى لێكه‌وته‌وه .
له كۆتاییدا رشتنى خوێنى هه‌ر كورد و ئیراقیه‌ك ئۆباڵه‌كه‌ى له ئه‌ستۆى ئه‌و فتوایانه‌یه ، میژوو تۆمارى ده‌كات چۆن كۆمه‌ڵه كه‌سێكى شۆڤێنى له‌به‌رگى ئاینى گڕیان به‌ردایه خوێنى عێراقییه‌كان و بوونه مایه‌ى فتنه و كوشت و كوشتارى ناو موسڵمانان و له‌برى خێر بوونه مایه‌ى فیتنه و لاپه‌ڕَه‌یه‌كى ڕه‌شیان له مێژووى خۆیان تۆمار كرد .
یەکێتی زانایانی ئایینی ئیسلامی کوردستان پەیامێکی پیرۆزبایی بە بۆنەی جەژنی رەمەزانی پیرۆز بڵاو دەکاتەوە
