به‌ناوی خوای گه‌وره میهره‌بان
ده‌ستدرێژییه‌كانی ئه‌م دواییه‌ی تیرۆریستان‌و دوژمنانی ئیسلام و مرۆڤ كردیانه سه‌ر هه‌رێمی كوردستان، له هه‌موو لایه‌ك ده‌خوازێت هه‌ڵوێستی مه‌یدانی‌و مه‌عنه‌وی‌و مادی هه‌بێت بۆ به‌ره‌نگاربوونه‌وه‌ی هێزه‌كانی شه‌ڕ‌و خراپه‌كاری، كه خۆشبه‌ختانه یه‌كێتی زانایان وه‌كو نوێنه‌ری زانایانی ئایینی له یه‌كه‌م چركه ساته‌وه هه‌میشه به به‌یاننامه‌‌و سه‌ردانی مه‌یدانی چاكترین هه‌ڵوێستیان هه‌بووه.
ئه‌وه‌ی زیاتر ئێمه‌ی سه‌ربه‌رز كرد هه‌ڵوێستی وتاری هه‌ینی رابردووی مامۆستایانی ئایینی بوو، كه مامۆستایانی ئایینی له مینبه‌ری پیرۆزی مزگه‌وته‌كانه‌وه له سه‌رتاسه‌ری هه‌رێمی كوردستان وتاره‌كانیان ته‌رخانكرد بۆ قسه‌کردن ده‌رباره‌ی پیرۆزی به‌ره‌نگاربوونه‌وه‌ی ئه‌م تیرۆریستانه‌‌و، بۆ هاووڵاتیانی كوردستانیان روونكرده‌وه، كه شه‌ڕكردن له‌گه‌ڵ ئه‌م تیرۆریستانه جیهادی راسته‌قینه‌یه‌‌و، باشترین كه‌س ئه‌وانه‌ن كه رووبه‌رووی ئه‌م هێزه نامۆ به ئیسلام‌و مرۆڤایه‌تییه ده‌بنه‌وه، هه‌روه‌ها داوایان له خه‌ڵكی كوردستان كرد وه‌ك مێژووی پڕ سه‌روه‌ریان به‌رزترین وره‌یان هه‌بێت بۆ لێدانی ئه‌م تیرۆریستانه، هه‌روه‌ك زۆریشیان سه‌ردانی مه‌یدانی به‌ره‌كانی جه‌نگیان كرد‌و، چه‌كی شه‌ره‌فیان كردۆته شانیان.
لێره‌وه به پێویستی ده‌زانین ده‌ستخۆشیه‌كی گه‌رم له مامۆستایانی ئایینی بكه‌ین‌و، وه‌ك هه‌میشه جوانترین نموونه‌ی موسڵمانانه‌‌و مرۆڤانه‌‌و كوردانه‌یان پیشاندا بۆ به‌رگریكردن له خاك‌و نیشتیمان‌و نامووس‌و ماڵ‌و حاڵ‌و گیانی هاووڵاتیانی كوردستان، ده‌ستتان خۆش بێت‌و سه‌ربه‌رز بن، وه‌ك هه‌میشه له‌سه‌ر ئه‌م رێڕه‌وه پیرۆزه به‌رده‌وام بن.
یه‌كێتی زانایانی ئایینی ئیسلامی كوردستان
9/8/2014
