ئەمرۆ 27ی1ی2025 بە ئامادەبوونی بەرێز د.عبدالله مەلا وەیسی سەرۆکی یەکێتی زانایان و ماۆمستا مەلا جەلال خەیلانی جێگری سەرۆک و کاک طيب زرار بەرێوەبەری گشتی ئەوقافی پارێزگای هەولێرو د.بەشیر خلیل سەرۆکی بۆردی باڵای وتاری هەینی و مامۆستا نەبەز ئیسماعیل بەرێوەبەری ئەوقافی هەولێرو مامۆستا حاتەم گەردی بەرێوەبەری ئەوقافی دەوروبەرو مامۆستا سید موسی باقلانی بەرپرسی لقی هەولێری یەکێتی زانایان و ژمارەیەکی بەرچاو لە مامۆستایانی ئایینی سیمینارێکی تایبەت بە گەشتی مامۆستا مەلا طاهير بەحرکەیی بۆ وڵاتی یەمەن لە هۆڵی لقی هەولێری یەکێتی زانایان بەرێوە چوو.
سەرەتای سیمینارەکە وێڕای خوێندنەوەی چەند ئایەتێک لە قورئانی پیرۆز، بەرێز سەرۆکی یەکێتی زانایان وتەیەکی پێشکەش کردو هیوای خواست ئەم جۆرە سیمینارانە ببنە هەنگاوێکی گرنگ بۆ خزمەتی مامۆستایانی ئایینی و ناساندن و بایەخدانی رۆڵ و پێگەیان و دروستکردنی کەشێکی لەبار بۆ زیاتر بەرەو پێشبردنی رەوشتی رۆشنبیری ئایینی و گەنگەشەی پرسە گرنگ و گەرمەکان.
دواتر بەرێز مامۆستا مەلا تاهیر بەحرکەیی سیمینارەکەی پێشکەش کردو، تێیدا بە وردییەوە باسی لە گەشتەکەی بۆ وڵاتی یەمەن کردو تیشکی خستە سەر وێستگەکانی سەفەرەکی، چۆن بانگێشتکراوەو چیان باس کردووەو چیان ئەنجام داوە، لەگەڵ باسکردنی چەند تەوەرێکی زانستی و گفتوگۆی چەند پرسو بابەتێکی فیقهی و هاوچەرخ و پەیوەندی زانایانی کورد و یەمەن و تێڕوانینیان لە پابەندی رێڕەوی زانستی و عیرفانی و بڵاوکردنەوەی دینداری و پاراستنی رێبازیی زانستی.
دواتر مامۆستایانی بەشداربوو بە سەرنج و تێبینی و پرسیار سیمینارەکەیان دەوڵەمەند کردو بووە مایەی خۆشحاڵی هەموو لایەک.
