ئەمرۆ 29ی1ی2025 بەرێز د.عبدالله مەلا وەیسی سەرۆکی یەکێتی زانایان لە هۆڵی لقی سۆرانی یەکێتی زانایان، بە ئامادەیی ستافی لقی سۆران و بەرێوەبەری ئەوقافی سۆران و ژمارەیەکی بەرچاوو لە زانایانی ئایینی سۆران؛ سیمینارێکی تایبەتی بەناونیشانی (چۆنیەتی هەڵسوکەوت کردن لەگەڵ پێشهاتە فیقهیەکان) پێشکەش کرد.
لە سیمینارەکەدا بەرێز سەرۆکی یەکێتی زانایان بە شێوازێکی زانستی شرۆڤەی بابەتەکەی کردو چەند رێساو بنچینەیەکی فیقهی خستە روو، هاوکات چەندین نمونەی پرس و پێشهاتی هەنوکەیی وەک نمونە هێنایەوە، کە پێویست بەوە دەکات زانایانی ئایینی لە رووی تێگەیشتن و چۆنیەتی مامەڵەکردن لەگەڵیانەوە بە بیرێکی فراوان و زانستی و گونجاندن لەگەڵ بنچینەی فیقهی و لەبەر چاوگرتنی بۆچوونە فیقهییە تازەکان هەڵسوکەوت بکەن.
لە بەشێکی تری سیمینارەکە سەرۆکی یەکێتی زانایان تیشکی خستە سەر چەند پرسێک، کە جێی ناکۆکی و راجیایی نێو موسڵمانانن، لەم سۆنگەوە تەئکیدی لەوە کردەوە کە پێویستە راجیایی و خیلاف نەبێتە هۆکاری یەکتر شکاندن و رق بڵاوکردنەوە، بەڵکو پێویستە برایەتی و تەبایی ئەولەویەت بێت.
شایەنی باسە دواتر ئامادەبووان بە چەندین پرسیارو سەرنجی پەیوەستەوە سیمینارەکەیان دەوڵەمەند کرد، هەورەک لە سیمینارەکە سەرۆکی یەکێتی زانایان سوپاس و پێزانینی بەخشیە ژمارەیەک مامۆستای ئایینی سنوورەکە، کە بڕوانامەی ماستەرو مۆڵەتی زانستی مەلایەتیان بە دەست هێنابوو.
دواتریش سەرۆکی یەکێتی زانایان سەردانی بەرێوەبەرایەتی ئەوقافی سۆرانی کردو لەلایەن بەرێوەبەری ئەوقافەوە پێشوازی کراو لە دانیشتنێکدا چەند پرس و بابەتێک تاوتوێ کران.
