سه‌ر له به‌یانی ئه‌مڕۆ27/6/2010 شاندێكی رێكخراوی (كاپنی) ئه‌ڵمانی ،که له که‌نیسه‌کانی ئه‌ڵمانیاو سویسرا پێکهاتبوون سه‌ردانی مه‌كته‌بی ته‌نفیزی یه‌كێتی زانایانی ئایینی ئیسلامی كوردستانیان كرد، له دانیشتنه‌كه‌دا كه به‌ڕێوه‌به‌ری به‌ڕێوه‌به‌رایه‌تی گشتی كاروباری مه‌سیحی له وه‌زاره‌تی ئه‌وقاف و كاروباری ئاینی یاوه‌ریان بوو، مه‌لا عه‌بدوڵا سه‌عید سه‌رۆكی یه‌كێتی زانایان تیشكی خسته سه‌ر كار‌و چالاكیه‌كانی یه‌كێتی زانایان‌و، باسی له پێكه‌وه‌ژیانی ئایینی له كوردستان كرد، سه‌رۆكی یه‌كێتی زانایان گله‌یی له هه‌ندێك له رێكخراوه بێگانه‌كان كرد، كه كاتێك سه‌ردانی كوردستان ده‌كه‌ن به‌شێوه‌یه‌ك مامه‌ڵه ده‌كه‌ن، به‌ڵام كه ده‌چنه ده‌ره‌وه به‌داخه‌وه گوێمان له راپۆرتی بێ ئینسافانه ده‌بیت، بۆیه هیوادارین كه ئێوه هاتوونه‌ته كوردستان ده‌شڵێن گۆڕانێكی زۆر به‌سه‌ر هه‌رێمی كوردستان هاتووه، قسه‌كانتان وه‌كو خۆی بگه‌یه‌نن، ئێمه‌ش ئاماده‌ین هاوكاری هه‌موو لایه‌نێك بكه‌ین، كه به‌شێوه‌یه‌ك له شێوه‌كان خزمه‌ت به هه‌رێمی كوردستان‌و خه‌ڵكی كوردستان بكات.
وه‌فدی ناوبراو وێڕای خۆشحاڵی، گووتیان: به‌ڕاستی ئێوه په‌یامێكی ئه‌وه‌نده مه‌زن‌و جوانتان پێیه‌‌و، ده‌تانه‌وێت خزمه‌ت به وڵات‌و مرۆڤایه‌تی بكه‌ن‌و، به‌ڕاستی وێنای جوانی ئیسلام ده‌كه‌ن، بۆیه هیوادارین ئه‌زموونی ئێوه بگه‌یه‌نینه ئه‌هلی هه‌موو ئایینه‌كان‌و، له نزیكه‌وه‌ش كار بۆ ئه‌وه ده‌كه‌ین چۆن په‌یامی ئێوه به‌سه‌ر هه‌موو دینه‌كانی دیكه به‌رز كه‌ینه‌وه، په‌یامی ئێوه زامنكردنی ئاشتی‌و پێكه‌وه‌ژیانه له ئایینده‌دا‌و، دڵنیاشین ئه‌گه‌ر هه‌موو لایه‌ك وه‌ك ئێوه بیر بكاته‌وه هیچ گرفت‌و ئاریشه دروست نابێت.
به پێی زانیاره‌یه‌كانی (zanayan.org) وه‌فدی ناوبراو به زانایانی ئایینی ئیسلامیان راگه‌یاندووه كه: دڵنیاشتان ده‌كه‌ینه‌وه، كه ئێمه مامه‌ڵه له‌گه‌ڵ هیچ رێكخراوێكی مه‌سیحی ناكه‌ین، كه گرفت‌و كێشه‌‌و فیتنه له نێوان موسڵمانان‌و مه‌سیحیه‌كان دروست بكات‌و، ته‌نها هاوكاری ئه‌و گونده مه‌سیحیانه ده‌كه‌ین، كه شان به شانی موسڵمانان له‌سه‌ر ده‌ستی به‌عس وێران بوونه‌‌و، نه‌ك ئه‌و كه‌سانه‌ی به‌ناوی مه‌سیحیه‌ت په‌یدابوونه‌‌و، خه‌ریكی فیتنه‌‌و كێشه‌ن له نێو موسڵمانان، ئه‌گه‌ر هیچ هاوكاری ئه‌وانه‌مان بكردبایه دڵنیابن نه‌ده‌هاتینه سه‌ردانی ئێوه.
له داهاتووشدا هه‌ر كۆڕ‌و سمینارێكمان هه‌بوو، ئێمه بانگهێشتتان ده‌كه‌ین‌و، به‌وپه‌ڕی تواناشمان په‌ره به‌و هه‌ماهه‌نگیه ده‌ده‌ین.
سه‌رۆكی یه‌كێتی زانایان دڵنیای كردنه‌وه، كه كوردستان مه‌ڵبه‌ندی پێكه‌وه‌ژیانه‌‌و، هه‌ر به‌و جۆره‌ش ده‌مێنێته‌وه‌‌و، كه‌سیش ناتوانێت تێكی بدات، چونكه ئیسلام فێری كردووینه، كه به‌م شێه‌وه‌یه بین.
شایه‌نی باسه ئه‌م شانده رۆژی 22/6/2010 له رێگای فرۆكه‌خانه‌ی هه‌ولێری نیوده‌وله‌تی سه‌ردانی هه‌رێمی كوردستانیان كردووه.
| 
