بەناوی خوای گەورە‌و میهرەبان

[يَا أَيُّهَا الَّذِينَ آمَنُوا لَا يَسْخَرْ قَومٌ مِّن قَوْمٍ عَسَى أَن يَكُونُوا خَيْرًا مِّنْهُمْ]

دوای ئەوەی لە كۆنگرەی سێزدەی پارتی، بەڕێز مەسعود بارزانی سەرۆكی هەرێمی كوردستان رایگەیاند، كە (داواكاریی مافی دیاریكردنی چارەنووس‌و خەباتی سەردەمیانە‌و ئاشتیخوازانە بۆ گەییشتن بەم ئامانجە بۆ قۆناغی داهاتوو بە گونجاو دەزانێت).

لەلای خۆمانەوە وەك دەزگای رەسمی زانایانی ئایینی لە هەرێمی كوردستان پێدانی چارەنووس بە گەلی كورد بە هەقێكی رەوا‌و شەرعی دەزانین، ئەوەش دوای ئەوەی جیهانی ئیسلامی بەسەر چەندان ولاتی جودا جودا دابەش كرا، كە نەك هەر نەتەوە‌و وڵاتێكی سەربەخۆی هەیە، بگرە تەنها نەتەوەیەك زیاتر لە چەند دەوڵەتیان هەیە، بۆ ئەمەش ئەگەر بۆ هەر نەتەوەیەك دەوڵەتبوون رەوا‌و شەرعی بێت، ئەوا گەلانی دیكەش هەمان ماف‌و هەقیان هەیە، چونكە هیچ گەلێك لە گەلێك پیرۆزتر نییە، تا بۆ گەلێك دروست‌و بۆ گەلێك حەرام بێت.

پێشمان وایە بە تێڕوانینێكی مرۆیی‌و موسڵمانانە دەبوو گەل‌و نەتەوەكانی ناوچەكە دەستپێشخەری ئەوەیان بكردبایە، كە كوردیش وەك هەر نەتەوەیەكی دیكەی ناوچەكە خۆیان بڕیاریان لەسەر چارەنووسی خۆیان بدابایە.

بۆیە لێرەوە رایدەگەیەنین ئێمە وەك زانایانی ئایینی هەرێمى كوردستان پشتیوانی لەو هەنگاوە دەكەین‌و، پشتگیری هەر هەوڵێكیش دەكەین، كە مافی رەوای گەلی كورد پتر بێنێتە دی.

مەكتەبی تەنفیزی
یەكێتی زانایانی ئایینی ئیسلامی كوردستان
‏12‏/12‏/2010