بەناوی خوای گەورەو میهرەبان
رۆژی یەكشەمە (19/12/2010) لە هۆڵی لیژنەی ئەوقافو كاروباری ئایینی لە پەرلەمانی كوردستان كۆبوونەوەیەكی هاوبەشی لە نێوان لیژنەكانی ئەوقافو یاسایی بە ئامادەبوونی وەزیری ئەوقافو سەرۆكی یەكێتی زانایانو چەند ئەندامێك لە لیستە جیاوازەكانی پەرلەمانو زانایانی ئایینی دەربارەی بەكارهێنانی وشەی (جێندەر) لە یاسای وەزارەتی رۆشنبیریو لاوان، كە بە هەڵە شیكردنەوەی دەستەواژەی (جێندەر) لەلایەن هەندێك لە مامۆستایانی ئایینی لە وتاری هەینی رۆژی (17/12/2010)، دوای گفتوگۆیەكی چڕو پڕ بە پێویستمان زانی ئەم خاڵانەی خوارەوە روون بكەینەوە:
1/ هیچ یاسایەك لە پەرلەمانی كوردستان بەناوی (یاسای جێندەر) دەرنەكراوە.
2/ پەرلەمانی كوردستان پابەندە بە دەستووری عێراقی فیدڕاڵ مادەی (2) بڕگەی یەكەم (أ): (نابێت یاسایەك دابندرێت لەگەڵ حوكمە جێگیرەكانی ئیسلام ناتەبابێت). وە هەروەها پڕۆژەی دەستووری هەرێمی كوردستانیش جەغتی لەسەر هەمان بڕگە كردۆتەوە.
3/ پەڕلەمانی كوردستان پابەندبوونی خۆی بە پاراستنو پارێزگاریكردن لە بەها باڵاكانی كۆمەڵگای كوردستان دووپات دەكاتەوە.
4/ هاووڵاتیان دڵنیا دەكەینەوە، كە پڕۆسەی هاوسەرگیری تەنها بە پێی یاسای باری كەسیو شەرعی دەبێت.
5/ مەبەستی پەڕلەمانی كوردستان لە بەكارهێنانی وشەی (جێندەر) ئەو راڤە هەڵەیە نەبووە، كە لەلایەن هەندێك لە مامۆستایانی ئایینی بۆی كراوە، لە هەمان كاتیشدا وەزارەتی ئەوقافو لێژنەی ئەوقاف لە پەڕلەمانو یەكێتی زانایان كاری جیددی دەكەن لەگەڵ لایەنە پەیوەندیدارەكان بۆ لابردنی ئەم لێك تێنەگەییشتنە.
د. بەشیر خەلیل
سەرۆكی لێژنەی ئەوقاف
شێروان حەیدەری
سەرۆكی لیژنەی یاسایی
كامیل حاجی عەلی
وەزیری ئەوقاف
مەلا عەبدولا مەلا سەعید
سەرۆكی یەكێتی زانایان
ئارام قادر
لیستی كۆمەڵی ئیسلامی
ناسكە تۆفیق
لیستی یەكگرتووی ئیسلامی
د. زانا رەئوف
لیستی گۆڕان
گولیزار قادر
لیستی بزووتنەوەی ئیسلامی
دكتۆرە جیهان ئیسماعیل بنیامێن
لیستی رافیدەین
یەشار نەجمەدین
لیستی چاكسازی تروكمان |